नागपूर : शरीरसुखाची मागणी करीत मानसिक त्रास दिल्याने १९वर्षीय युवा कबड्डी खेळाडूने आत्महत्या केली. याप्रकरणी बुटीबोरी-एमआयडीसी पोलिसांनी गुन्हा दाखल करून कबड्डी प्रशिक्षकाला अटक केली.
संदीप प्रभू शेंडे (रा. चांदूररेल्वे, जि. अमरावती) असे अटकेतील प्रशिक्षकाचे तर सोनू (बदललेले नाव) असे मृतकाचे नाव आहे. सोनू ही राष्ट्रीय दर्जाची कबड्डी खेळाडू होती.
प्राप्त माहितीनुसार, दीड वर्षापूर्वी सोनू कबड्डी खेळण्यासाठी चांदूररेल्वे येथे गेली. येथे तिची संदीपसोबत ओळख झाली. ‘मी तुझे भविष्य घडवेल, तुला पोलिस अधिकारी बनवेल, तू माझ्यासोबत राहा’, असे संदीप सोनूला म्हणाला. सोनूने आई-वडिलांना याबाबत सांगितले. त्यानंतर सोनू ही चांदूर येथे भाड्याने खोली करून राहायला लागली. एप्रिल महिन्यात सोनू ही घरी परतली. ती कोणाशीही बोलत नव्हती. सतत तणावात राहायला लागली. बहिणीने सोनूला विचारणा केली. ‘तू मला आवडते, तू माझ्यासोबत शारीरिक संबंध ठेव, नाही तर तुझे कबड्डीचे भविष्य मी उद्ध्वस्त करेल’, असे संदीप शेंडे नेहमी म्हणत असल्याचे सोनूने बहिणीला सांगून ती रडायला लागली. बहिणीने तिला धीर दिला.
‘परत जाऊ नकोस’, असे बहीण तिला म्हणाली. तेव्हापासून सोनू ही घरीच राहायला लागली. संदीप हा तिला व तिच्या नातेवाइकांच्या मोबाइलवर सतत संपर्क साधून सोनूला परत पाठविण्यासाठी दबाव टाकायला लागला. मानसिक दडपणात असलेल्या सोनूने ३१ जुलैला सकाळी ११ वाजताच्या सुमारास विष प्राशन केले. तिची प्रकृती खालावली. नातेवाइकांनी तिला एम्समध्ये दाखल केले. उपचारादरम्यान याच दिवशी सायंकाळी ८.१५ वाजताच्या सुमारास तिचा मृत्यू झाला. पोलिसांनी आकस्मिक मृत्यूची नोंद करून तपास सुरू केला. तपासादरम्यान संदीपने शारीरिक सुखाची मागणी करून दबाव टाकल्याने सोनूने आत्महत्या केल्याचे समोर आले.
पोलिसांनी आत्महत्येस प्रवृत्त केल्याचा गुन्हा दाखल करून संदीपला अटक केली. संदीप हा सध्या न्यायालयीन कोठडीअंतर्गत कारागृहात आहे.
लग्न मोडल्याने बसला जबर धक्का
तणावात असलेल्या सोनूची नातेवाइकांनी समजूत घातली. तिला लग्नाबाबत विचारले. तिने होकार दिला. त्यानंतर ३० जुलैला सोनूचे यवतमाळ येथील युवकासोबत लग्न पक्के झाले. याची माहिती संदीपला मिळाली. संदीपने युवकाशी संपर्क साधला. ‘तू सोनूसोबत लग्न करू नकोस, तिचे चारित्र्य वाईट आहे’, असे संदीपने युवकाला सांगितले. त्यानंतर दुसऱ्याच दिवशी युवकाने सोनूच्या नातेवाइकांच्या मोबाइलवर संपर्क साधला. ‘मी सोनूसोबत लग्न करू शकत नाही. संदीपने मला तिच्याबाबत सर्व सांगितले आहे’, असे युवक नातेवाइकांना म्हणाला. ही बाब सोनूला कळाली. जबर धक्का बसल्याने सोनूने आत्महत्या केली.
