अर्थसंकल्पानंतर भारतीय शेअर बाजारात मोठी घसरण झाली आहे. आज सेन्सेक्स 678 अंकांनी कोसळला आहे. तर निफ्टीतही 207 अंकांची घसरण झाली आहे. तसेच टाटा मोटर्स, टाटा स्टील, झोमॅटो, इंडसइंड बँकेच्या शेअर्समध्येही मोठी घसरण झाली आहे.
त्यामुळे गुंतवणूकदारांचे पैसे बुडाले आहेत. याबाबत सविस्तर माहिती जाणून घेऊयात.
अमेरिकेच्या धोरणाचा परिणाम
अमेरिकेचे अध्यक्ष डोनाल्ड ट्रम्प यांनी चीन, कॅनडा आणि मेक्सिकोवरील कर वाढवण्याची घोषणा केली होती, त्यानंतर या देशांनी प्रत्युत्तरादाखल कर लादण्याचा निर्णय घेतला आहे. त्यामुळे जगभरातील बाजारपेठांमध्ये घसरण होत आहे. अमेरिकन सरकारने कॅनडा आणि मेक्सिकोमधून आयात होणाऱ्या वस्तूंवर 25 टक्के आणि चिनी वस्तूंवर 10 टक्के कर लावण्याची घोषणा केली आहे.
सेन्सेक्स 678 अंकांना कोसळला
डोनाल्ड ट्रम्प यांच्या घोषणेमुळे गुंतवणूकदारांमध्ये भीतीचे वातावरण पसरले आहे. ज्यामुळे प्रमुख आशियाई शेअर बाजारांमध्ये मोठी घसरण झाली. त्याचा परिणाम भारतीय बाजारपेठेवर दिसून येत आहे. आज सुरुवातीच्या व्यवहारात सेन्सेक्स 678 अंकांनी घसरून 76827 अंकांवर पोहोचला. त्याच वेळी एनएसई निफ्टी 207 अंकांनी घसरून 23274 अंकांवर पोहोचला. तसेच आज टाटा मोटर्स, टाटा स्टील, झोमॅटो, इंडसइंड बँकेतही मोठी घसरण दिसून येत आहे.
बाजार उघडताच गुंतवणूकदारांचे 5 लाख कोटी रुपये बुडाले
बाजारातील प्रचंड घसरणीमुळे गुंतवणूकदारांचे अवघ्या 5 मिनिटांत 5 लाख कोटी रुपये बुडाले आहेत. गेल्या काही काळापासून गुंतवणूकदारांना सतत तोटा सहन करावा लागत आहे. बाजारातील मोठ्या घसरणीमुळे म्युच्युअल फंड गुंतवणूकदार निराश झाले आहेत. यामुळे बंद होणाऱ्या एसआयपी खात्यांची संख्या विक्रमी पातळीवर पोहोचली आहे. कारण अनेकांनी आपले पैसे काढून घेतले आहेत.
आशियाई शेअर बाजारांमध्येही मोठी घसरण
व्यापार युद्ध सुरू झाल्यापासून अमेरिकेसह जगभरातील बाजारपेठांमध्ये मोठी घसरण दिसून येत आहे. जपानच्या निक्केई 225 निर्देशांकासह प्रमुख आशियाई निर्देशांक 2.27 टक्क्यांहून अधिक घसरले, तर हाँगकाँगच्या हँग सेंग निर्देशांकात 2.07 टक्क्यांनी घसरण झाली. तैवानच्या निर्देशांकात सर्वात मोठी 3.47 टक्क्यांहून अधिक घसरण झाली. अनेकदा अमेरिकेच्या धोरणांचा आशियाई बाजारपेठांवर मोठा परिणाम होतो. त्यामुळेच आजही बाजारात मोठी घसरण झाल्याचे दिसत आहे.
