मुंबईतील सुप्रसिद्ध सिद्धीविनायक मंदिरात ड्रेस कोड लागू करण्यात आला आहे. सिद्धीविनायक मंदिर ट्रस्टकडून ड्रेसकोड संदर्भातील अधिकृत पत्रक जारी करण्यात आले आहे.
भारतीय पारंपरिक वेशभूषा किंवा अंगभर कपडे घातलेले पाहिजे तरच त्यांना मंदिरात दर्शनासाठी प्रवेश देण्यात येणार असल्याचे पत्रात नमूद करण्यात आले आहे. पुढच्या आठवड्यापासून ड्रेसकोड बाबतचे नियम लागू करण्यात येणार आहेत.
भाविकांच्या तक्रारीनंतर निर्णय –
सिद्धीविनायक गणपती मंदिर हे गणेशभक्तांचे आराध्यदैवत आहे. येथे गणरायाच्या दर्शनासाठी राज्यासह देशभरातून दररोज हजारो भाविक येत असतात. त्यामध्ये अनेकांचा पेहराव हा इतरांना संकोच वाटणारा दिसून येतो, अशा तक्रारी सातत्याने भाविकांकडून येत होत्या. त्यामुळे सिद्धीविनायक मंदिरात ड्रेस कोड लागू करण्यात यावा, अशी मागणी गेल्या अनेक दिवसांपासून करण्यात येत होती. अनेक भाविकांनी त्यापद्धतीचे मत मांडले होते. यानंतर हा निर्णय घेण्यात आला असल्याचे ट्रस्टकडून स्पष्ट करण्यात आले आहे.
शॉर्ट्स परिधान करणाऱ्यांना प्रवेश बंदी –
माघी गणेश जयंतीच्या निमित्ताने सिद्धीविनायक मंदिरात मोठा उत्सव साजरा केला जातो. त्याच पार्श्वभूमीवर ट्रस्टच्या सदस्यांची बैठक झाली आणि त्यामध्येच एकमताने हा निर्णय घेण्यात आला. जे पुरुष किंवा महिला भाविक शॉर्ट्स कपड्यांमध्ये सिद्धीविनायक मंदिरात येतात त्यांना आता प्रवेश बंदी करण्यात आली आहे. ज्या महिला किंवा मुली ज्या शॉर्ट्स कपड्यांमध्ये येतात त्यांना प्रवेश दिला जाणार नाही. मंदिरातील पावित्र्य राखण्यासाठी हा निर्णय घेण्यात आल्याची माहिती आहे.
